Maigret se fâche!!

البارح و أنا مروحة لعشية و بالطبيعة تاعبة بعد نهار خدمة (أنا يتعبوني الي يخدمو معايا أكثر ملخدمة، تو نرجع نحكي عليهم نهار آخر)، و الدنيا Embouteillage و أنا موسعة بالي و حاطة  CD أليسا و إذا بيه واحد يعمل في demi tour و يحب يرجع في  sens inverse.أنا ملول ما فهمتوش شنوه يحب يعمل،  أما كي شفتو خرج يدو مالشباك و ركزت معاه شوية فهمت إلي هو قال للجماعة الكل آقفوخليوني أنا كهو نتعدا خاترني نحب نمشي في  sens interdit!!! وسعنا بالنا معاه و خليناه عمل الدورة المحنونة و مشى. واحد واقف بحذا شباكي قالي "هاي الحرية" "هاي الحرية" "ريت الحرية وين توصل". طلعت البلار و قتلو في قلبي "بربي برا زمر إنتي"، توا كل حاجة خايبة في البلاد باش يقيدوها عل حرية، حتى كي لكلاب ولقطاطس يفرتو les poubelles باش توحلوها فلحرية. تي أكثر التوانسة من أول الدنيا هكا!! On était toujours comme ça!! من عهد بو رقيبة لعهد بن علي إلى يومنا هذا و احنا نحرقو في الضو لحمر و نمشيو في les sens interdits!! ونحطو في كراهبنا علمادة و les piétons يمشيو فلكياس!! طول عمرنا ما نستعرفوش بحاجة اسمها صف!! طول عمرنا نتعاركو مع les agents de guichets et les taxistes على خاطر ما عندهمش الصرف و احنا كيف كيف!! إمالا علاش تلفقو في الهمجية في الحرية و الديمقراطية!! يهديكم... يهديكم... نعرفوكم انتوما واعين و تفهمولها و شي ما يفوتكم... أما لحقيقة الشي هذا أقوى منكم... انتوما عايشين مكبوتين 50 سنة و توا جايين تحكيو عل همجية و البربرية متاع التوانسة ...

هاذاكة علاش أنا من اليوم قررت باش ما عادش نحكي في السياسة و ما عادش نخاف على تونس على خاطر تبارك الله عندنا 12 مليون مثقف و مفكر و رجل قانون... تو هوما يرجعولنا فلوسنا إلي هزتهم "ليلوتة" و الأراضي الي فكهم "عمدة" ...

أعملو جو عاد مع بعضكم و ما تنساوش تزيدو تشعلوها عل Facebook!!